مش معقول.......تاج من شاب دمياطي؟

ايه ده؟....بصراحة أنا مش مصدق.....جالي تاج من واحد شاب دمياطي؟؟؟
يااااااااه،والله انت فعلا انسان(بص طبعا عشان التاج ده حاجة معنوية انت بعته،لكن لوكان حاجة مادية ولا كان هيحصل)،ما علينا.
المهم ان انت حسنت صورة الدمياطيين قدامنا،وهنبدأعلى بركة الله(على رأي الدكتور /سامي عبد العزيز)

س/ من هو أحب شخص لقلبك في الدنيا؟
أكيد طبعا أمي ....ست الحبايب يا حنانا انت..
س/انسان مستعد تضحي بحياتك -ركز في كلمة حياتك عشانه؟
غريب والله يا أحمد...أنا شايف (رغم ان نظري ضعيف)ان السؤال ده مرتبط باللي قبله لأن التضحية في الأغلب مرتبطة بالحب ،بس عشان ما أحرجكش وأخللي منظرك وحش أنا برضه هقولك أمي ،و أكيد في ناس تانية برضه يعني.

س/اسم أول حب؟
اه،تصدق يابني ،انت دايما بتيجي ع الجرح ،ااااااااااه والله فكرتني بأيام زمان بس برضه أكيد أمي طبعا.....وبرضه أصحاب الحضانة اللي انت مش هتعرفهم،ونظرا لأني عارف ان السؤال مش نضيف بالمرة،فأنا هقولك ان أصحاب الحضانة دول (كان فيهم بنات طبعا)..

س/اسم اخرحب؟
.....والله هو يعتبر....الواد (خالد سلام) حبيب قلبي و(الأي أي)بتاعي،والواد (أحمد شلبي )برضه،ومعاك بقي سنوسي وهشام وعالم كتيييير..

س/انسان كرهته لدرجة الجنون،وتمنيت لو تمسك سكينة وتنقض عليه وتغرزها ف قلبه تقتله وتقف تبص علي جثته تشفي غليلك؟

ياااااااااه،طب لازمتها السيرة دي دلوقتي،لابارك الله فيه،ومش عايزين نجيب في سيرة حد

س/اسم أجمل كتاب كتبه بشر قرأته ومحتفظ به حتى الان؟
.....كتاب (أخبار الحمقى والمغفلين)لابن الجوزي

س/اسم كتاب كتبه بشر برضه،انت متعلق به وتقرأه كل فترة؟
....كتاب (رياض الصالحين)للامام النووي

س/شيء تحس بالراحة النفسية حين تنظر اليه؟
....علي أبو شنب، (صحفي)،أستاذي وحبيب قلبي وأعز مخاليق ربنا لقلبي وعلي فكرة هو واحشني بعنف وأحب أقوله شوقي يمزقني اليك........متي يكون لنا لقاء

س/مكان تحس بالراحة حين تدخله؟
.....والله هو في أماكن كتير....بس في الأغلب بيكون الحمام (بيت الراحة) بتاع بيتنا (في حالات معينة ولا مؤاخذة )



س/أجمل مدينة زرتها داخل مصر؟
.....يعني تعتبر مدينة 6 أكتوبر الحبيبة (اللي أنا عايش فيها)

س/أجمل مكان طبيعي رأيته داخل مصر؟
.....ممكن نقول (الصحرا اللي ورا نزلة السمان اللي بتطلعك ع الهرم)،يابني أنا ما شوفتش أماكن طبيعية حلوة ف مصر والله......غريب يا أحمد

س/نوع هاتفك المحمول؟
......مليكش فيه.....وعلي فكرة مش هجاوبك لأنك جيت في وقت غيرمناسب(وقت غداء)،علي رأي الدكتور/سامي عبد العزيز).

س/المساحة التي تشغلها المواد الاسلامية علي جهازك؟
......الصراحة السؤال ده أنا أعرف انه بيتسأل في مكان واحد بس....ويلا مش مهم

س/نفس المساحة السابقة بس في قلبك؟
نحمده علي نعمة الستر،ونسأله الاخلاص

س/مواصفات فتاة أحلامك؟
......اه بجد بتحرجني ،وبتيجي ع الجرح،والله اللي ربنا كاتبه هايكون، بس حبذا لو مش بتلبس نضاره وبعدين انت بتسأل ليه؟...عندك عروسة؟

س/شعورك لما بتسمع كلمة مصر؟
....علي طول بفتكر أيام طابور الصباح ف المدرسة والأغنية اللي فيها......( مصر يا أم البلاد)

س/شعورك لما بتسمع كلام عن اليهود؟
علي طول بيبقي نفسي أجيب فلوس و أروح أشتري لترين جاز وعلبة كبريت وأروح أولع فيهم واحد واحد
س/شعور لما بتشوف ضابط شرطة؟
ياتري بالبدلة البيضة ولا السودة؟ وعامة في كلا الحالتين بفتكر،واحد صاحبي اسمه (دسوقي)....بس....وتعرف تسكت بقي؟ عشان شكلك كده مش ناوي تجيبها لبر


س/شعورك لما بتشوف الكناس العجوز في الطريق؟
....يعني طبعا بكون مشفق عليه وكده....بس والله ببقي منبهر بيه
س/لون البطانية اللي بتتغطي بيها في الشتاء؟
زي بالظبط لون الملايا اللي بنام عليها،وكذلك المخدة،أًصلى احنا شاريين طقم كامل

س/لون الجورب (الشراب)المفضل اليك؟
بمبي مسخسخ.....برضه

س/لمن تهدي هذا التاج؟
......أنا في النهاية أحب أهدي التاج ده ،لماما وبابا وتيته الله يرحمها وعمي وبناته الاتنين وأم هبة جارتنا،وعم عبده بتاع الجرايد،وأم رؤوف مراته وابنهم روؤف وبطلب أسمع اأغنية ...(ست الحبايب يا حنانا نانا).......غريب والله يا أحمد

في البداية

بالأمس القريب كنت جالسا مع نفسي نستعيد سويا شريط الحياة،وأمر على مراحلها المختلفة مرحلة مرحلة وقد كنت أقف عند كل مرحلة من تلك المراحل،وأتذكر ما كان فيها.فأحيانا أقف عند مرحلة معينة وأضحك على ما كان فيها من براءة وسذاجة وسعادة وفرح،وأحيانا أقف عند أخرى فاذا بي أبكي على ماكان في تلك الأيام من أحزان وأوجاع وجراح.....وبينما أسير في رحلتي مع الشريط ،فاذا بشىء غريب يحدث عند وصولي لاخر مرحلة من تلك المراحل،واذا بشبح من الوجوم والتمبلة قد خيم علي،واذا بالمشاعر المختلجة تتحرك في قفصي الصدري......حقيقة لا أدري هل أبكي علي تلك المرحلة التي ضاعت سدى،وعلى حالي فيها مع الله ومع الناس؟؟؟؟؟؟؟أم أضحك وأخرج تلك القهقهات الهيستيرية(مثل الشاب الجالس على القهوة
مشاهدا فيلم بوحة وما فيه من افيهات)علي تلك الأيام وما كان فيها من طيش واندفاع وهبل وهطل.لا أدري ماذا أفعل.....

فلو تأملت بعينيك (التي حتما سيأكلها الدود يوما ما)،لرأيت شابا يرتدي (من غير هدوم)،في مقتبل العمر ،يعيش حياة ظاهرها (بمبي مسخسخ)،وباطنها(سوداء مقطرنة)......فهو لايعرف الا (الحريم)طريقا للتعبير عن أحلامه وأماله،ولا يعرف الا (الكليوباترا الفرط)طريقا للتعبير عن ضيقه وهمومه والبوح بها،كما لايعرف الا(المسك في خناق البني ادمين)للتعبير عن شبابه وانطلاقه وقوته و(نضوجه)..........فلقد كان يجد في تلك الأشياء ما يرفع كلا من مزاجه ودماغه العاليتين.

ولأن لغة الصورة قد أثبتت أنها أفضل الطرق لايضاح الحقائق وايصال المفاهيم فلن أتكلم وأصف كثيرا.....وأعتقد ان الموضوع باين من الصورة

ولا يظنان ظان أنني أكتب هذه التدوينة من باب الفشخرة واظهار العضلات والتي شيرت (الأديداس)العنيف،ولكنني أكتبها لأسباب عدة لعل أهمها أن تكون بداية حياة جديدة لشاب قرر أن يبدأ من جديد راجيا من الله أن يغفر له ولغيره،وأن يعرف كل الناس أنه من السهل جدا أن تتخلي عن كل شيءفي سبيل فكرة قد امنت بها.

وأنا دلوقتي بدأت المشوار الطويل للتغيير ،وأنا لسة في البداية